OKB: Ndërhyrja e SHBA-së në Venezuelë sfidon ligjin ndërkombëtar

Pixabay

Organizata e Kombeve të Bashkuara ka deklaruar se ndërhyrja ushtarake e SHBA-së në Karakas “ka minuar një parim themelor të së drejtës ndërkombëtare” dhe ka shprehur shqetësimin e saj të thellë, rapprton mediumi zviceran rts transmeton albinfo.ch.

Presidenti i përmbysur venezuelian, Nicolás Maduro, mbetet i burgosur në New York dhe do të paraqitet sërish në gjykatë më 17 mars. Gjatë paraqitjes së tij të parë, ai mohoi akuzat për trafik droge dhe theksoi se “ende është president i vendit të tij”. Maduro dhe bashkëshortja e tij u rrëmbyen të shtunën nga forcat amerikane gjatë një sulmi natën në Venezuelë dhe u transferuan në një burg federal në Brooklyn.

Maria Corina Machado, laureate e Çmimit Nobel për Paqen dhe lidere e opozitës, njoftoi se planifikon të kthehet në Venezuelë “sa më shpejt të jetë e mundur”. Ajo kritikoi ashpër Delcy Rodríguez, e cila u betua të hënën si president e përkohshme e Venezuelës.

Presidenti amerikan Donald Trump konfirmoi se SHBA-ja tani është “në kontroll” të Venezuelës dhe kërcënoi Delcy Rodríguez me një fat më të keq se ai i Nicolás Maduro. Ai tha se SHBA do të udhëheqë vendin deri në një “transicion politik të sigurt”.

Sulmi amerikan në Karakas shkaktoi viktima të mëdha: 32 ushtarë kubanezë dhe 23 ushtarë venezuelianë humbën jetën.