Kryeministri kanadez Mark Carney pritet me ovacione në Davos

Mark Carney në Davos: Rendi ndërkombëtar i bazuar në rregulla nuk funksionon më

Kryeministri i Kanadasë, Mark Carney, u prit me ovacione në këmbë pas fjalimit të tij në Forumin Ekonomik Botëror në Davos, ku deklaroi se rendi ndërkombëtar i bazuar në rregulla nuk funksionon më siç pretendohet, përcjell albinfo.ch.

Duke cituar Václav Havel, Carney tha se shumë shtete “po jetojnë brenda një gënjeshtre”, ndërsa fuqitë e mëdha përdorin tregtinë, financat dhe zinxhirët e furnizimit si mjete presioni politik. Sipas tij, bota po përjeton një çarje të thellë, ndërsa institucione si OKB-ja dhe OBT-ja janë dobësuar.

Ai paralajmëroi se izolimi dhe “fortesat kombëtare” do ta bënin botën më të pasigurt dhe më të varfër, duke theksuar se vendet e mesme duhet të bashkëpunojnë dhe të ndërtojnë koalicione funksionale.

Carney prezantoi qasjen e re të Kanadasë, “realizëm i bazuar në vlera”, duke nënvizuar forcimin e ekonomisë, rritjen e shpenzimeve për mbrojtjen dhe zgjerimin e partneriteteve globale.

“Epoka e vjetër nuk do të kthehet. Nostalgjia nuk është strategji,” përfundoi ai.

---