Pas janarit pa alkool, vjen shkurti pa rrjete sociale

Foto Ilustrim

Pas sfidave si “Dry January” dhe “Veganuary”, dimri sjell një nismë edhe më radikale: një muaj pa rrjete sociale. E quajtur “Off February”, kjo lëvizje e nisur në katër vende synon që njerëzit të bëjnë një pauzë kolektive nga platformat digjitale.

Sfida konsiston në fshirjen e aplikacioneve të rrjeteve sociale nga telefoni për 28 ditë, pa u shkëputur plotësisht nga bota, por për të kuptuar se si ndryshon jeta kur ekrani fiket. Nisma është lançuar nga rreth 50 shoqata në Francë, Spanjë, Mbretërinë e Bashkuar dhe Shtetet e Bashkuara.

Një muaj pa Instagram, TikTok dhe zakonet automatike që na tërheqin pa e kuptuar, është thelbi i kësaj sfide. Sipas themeluesit të lëvizjes, Diego Hidalgo, ideja ishte krijimi i një versioni digjital të “Dry January”.

“Heqja dorë nga telefoni për një muaj ishte e parealizueshme, ndaj u fokusuam te rrjetet sociale. Nuk po u kërkojmë njerëzve të fshijnë llogaritë e tyre, por të rimarrin kontrollin,” shpjegon ai.

Jo ndëshkim, por rikthim i kontrollit

Qëllimi i “Off February” nuk është ndëshkimi, por thyerja e përdorimit kompulsiv të platformave, të cilat, sipas organizatorëve, na marrin mesatarisht 50–60 orë në muaj.

Pjesëmarrësit ftohen të ndajnë përvojat e tyre brenda komunitetit të nismës, në mënyrë që të matet ndikimi i shkëputjes së zgjatur nga rrjetet sociale.

Kjo sfidë vjen në një moment kur alarmet shëndetësore po shtohen. Së fundmi, Agjencia Kombëtare Franceze për Sigurinë Shëndetësore (ANSES) ka theksuar lidhjen mes përdorimit intensiv të rrjeteve sociale dhe problemeve si çrregullimet e gjumit, ankthi dhe vështirësitë në përqendrim, veçanërisht tek të rinjtë.