“Ndihem si idiot”, thotë Lajçak pas zbulimit të mesazheve në dosjen Epstein

Diplomati evropian u shpreh kështu pasi mesazhet e tij u bënë publike

Miroslav Lajçak ka dhënë një intervistë për transmetuesin publik Rádio Slovensko pasi emri i tij u shfaq në publikimin e fundit të dosjeve të Jeffrey Epstein të premten, ndërsa të nesërmen dha dorëheqje si këshilltar i kryeministrit Robert Fico, përcjell albinfo.ch.

Në transmetim, ai kryesisht i qëndroi linjës së paraqitur në reagimin e tij të së shtunës.

“Nuk i mbaj mend sinqerisht ato mesazhe,” i tha diplomati sllovak radios, duke iu referuar shkëmbimeve që përfshinin vajza.

“Nuk mund t’i konfirmoj, por as t’i mohoj.”

Pasi i lexoi sërish mesazhet, ai shtoi se ishte ndier “si idiot”.

“Por kjo nuk më përjashton nga përgjegjësia,” tha ai.

Lajçak shpjegoi se kishte mbërritur në New York në vitin 2017 për të marrë një post njëvjeçar në Kombet e Bashkuara dhe se ishte prezantuar me Epstein nga një diplomat i lartë i huaj.

Sipas tij, Epstein ishte gjerësisht i njohur dhe takonte figura të shumta biznesi dhe politike nga SHBA-ja dhe jashtë saj.

Ai tha se nuk shihte arsye për të mos e takuar, duke argumentuar se krijimi i kontakteve ishte pjesë e punës së tij.

---