Shqipëria prezantohet si destinacion autentik në ITB Berlin 2026

Durrësi në fokus si qytet i detit, historisë dhe mikpritjes

Potenciali turistik i Shqipërisë u prezantua në ITB Berlin 2026, ku vendi u pozicionua si një destinacion autentik mesdhetar me oferta të larmishme dhe përvoja unike, transmeton albinfo.ch.

Kryeministri Edi Rama ndau një video promovuese të Durrësi, duke e paraqitur atë jo vetëm si qytet bregdetar, por si një qendër që ndërthur detin, historinë dhe zhvillimin modern. Durrësi mbetet një ndër destinacionet më të preferuara për turistët vendas dhe të huaj, falë trashëgimisë së pasur kulturore me monumente si Torra Veneciane e Durrësit, Mozaiku i Bukuroshes së Durrësit, Amfiteatri i Durrësit dhe Muzeu Arkeologjik i Durrësit.

Në këtë panair, Shqipëria u paraqit me një agjendë që ndërthur inovacionin, kulturën dhe bukuritë natyrore. Nga Alpet Shqiptare për turizëm malor e aventurë, te Riviera për pushime bregdetare, qytetet historike dhe fshatrat me ofertë gastronomike, vendi synon të forcojë pozicionimin si destinacion i turizmit të qëndrueshëm.

Për Shqipërinë, ITB Berlin 2026 përfaqëson më shumë se një panair promovimi, është një dritare strategjike drejt së ardhmes së turizmit./Albinfo.ch

---