Kosovë-Serbi, marrëveshje në pako

Kosova dhe Serbia nënshkruajnë katër marrëveshje, mes tyre edhe formimi i Asociacionit të Komunave Sere dhe atë për telekomin. Kosova tashmë do ta ketë prefiksin 383

Pas një raundi të vështirë bisedimesh në Bruksel, dy kryeministrat, Isa Mustafa dhe Aleksandër Vuçiq kanë nënshkruar marrëveshjen në pako, që përfshinë katër marrëveshje të veçanta, atë për Asociacionin e Komunave Serbe, për Telekomin, Energjetikën dhe për Heqjen e barrikadës mbi lumin Ibër.

Zëvendëskryeministri i Kosovës, Hashim Thaçi ka konfirmuar se Serbia dhe Kosova sapo kanë nënshkruar marrëveshjen pako, e cila përfshinë edhe marrëveshjen për formimin e Asociacionit të Komunave Serbe.

“Marrëveshja është arritur. Ju konfirmoj se çdo marrëveshje është në përputhje me Kushtetutën e Kosovës”, ka thënë Thaçi, sipas të cilit, Asociacioni është në përputhje të plotë me kushtetutën e Kosovës dhe nuk do të ketë kompetenca ekzekutive siç ka kërkuar pala serbe.

Edhe shefja për Politikë të Jashtme e BE-së, Frederika Mogherini ka njoftuar që janë nënshkruar katër marrëveshje në mes të Kosovës dhe Serbisë. Në një postim në twiter, Mogehrini ka thënë që këto marrëveshje është arritur të nënshkruhen pas një dite të gjatë bisedimesh në mes të palës kosovare dhe serbe.

Sipas Marrëveshjes, Kosova në të ardhmen do ta ketë prefiksin e vet telefonik me 383, ndërsa në emër të Kosovës kërkesën do ta bëj Austria.