Lufthansa nis shkurtime drastike, preken mbi 100 mijë punonjës, përfshirë Swiss

Lufthansa nis shkurtime drastike, ngrirje punësimesh dhe ndalim udhëtimesh prekin mbi 100 mijë punonjës, përfshirë Swiss

Grupi Lufthansa po ndërmerr një program të gjerë dhe të ashpër për uljen e kostove, i cili prek mbi 100 mijë punonjës në të gjithë kompaninë, përfshirë edhe linjën ajrore zvicerane Swiss, përcjell albinfo.ch.

Masat përfshijnë ngrirje të menjëhershme të punësimeve, ndalim të udhëtimeve të biznesit që përfshijnë qëndrime në hotele, si dhe reduktim të buxhetit për trajnime dhe aktivitete ekipore me rreth 10 për qind. Po ashtu, kompania nuk do të nënshkruajë kontrata të reja me konsulentë të jashtëm dhe planifikon të rishikojë çmimet, rrjetin e linjave dhe flotën e saj ajrore.

Sipas një emaili të brendshëm të menaxhmentit të Lufthansa-s, arsyeja kryesore për këto masa është “rritja e pasigurisë ekonomike”, e ndikuar nga faktorë si tensionet gjeopolitike dhe rritja e çmimeve të karburantit.

Swiss International Air Lines ka konfirmuar ekzistencën e dokumentit të brendshëm dhe faktin se edhe ajo preket nga këto masa. Megjithatë, një zëdhënës i kompanisë theksoi se nuk bëhet fjalë për informacione të reja thelbësore, por për masa që janë diskutuar më herët.

Linja ajrore zvicerane po përballet tashmë me presione të konsiderueshme financiare. Në vitin 2025, fitimi i saj ra me 26.6 për qind krahasuar me një vit më parë. Gjithashtu, janë parashikuar edhe shkurtime të stafit në mesin e ekuipazheve të kabinës, të shoqëruara me paketa kompensimi prej rreth 15,000 frangash zvicerane. /Albinfo.ch

---