Fundjava në Zvicër sjell diell dhe temperatura të ngrohta

Diell dhe temperatura verore në fundjavë në Zvicër

Fundjava në Zvicër akterizohet nga mot i ngrohtë, shumë diell dhe pak erë. Sipas meteorologëve, ditët në vijim do të jenë ideale për aktivitete në natyrë, megjithëse temperaturat në mëngjes mbeten ende relativisht të freskëta, përcjell albinfo.ch.

Sipas meteorologut Klaus Marquardt nga MeteoNews, temperaturat do të rriten gradualisht gjatë ditëve në vijim. Të enjten priten rreth 19 deri në 20 gradë Celsius, të premten 21 deri në 22 gradë, ndërsa të shtunën temperaturat mund të arrijnë deri në 23 gradë.

Në kantonin jugor Ticino temperaturat do të jenë edhe më të larta, duke arritur nga 23 deri në 25 gradë Celsius, çka krijon një ndjesi pothuajse verore për këtë periudhë të pranverës.

Megjithatë, ekspertët këshillojnë që qytetarët të mos largojnë ende xhaketat e lehta. Në mëngjes temperaturat mbeten të freskëta dhe një xhaketë është ende e nevojshme, ndërsa nga fundi i paradites dielli bëhet më i fortë dhe pasditja mund të kalohet me rroba më të lehta, madje në shumë vende edhe vetëm me bluzë me mëngë të shkurtra./Albinfo.ch

---