Veturat e mërgimtarëve shiten për pjesë

Brenda një dite, doganierët kosovarë kanë kontrolluar disa pika të shitjes së auto-pjesëve dhe kanë arritur t’i zbulojnë disa vetura të pa zhdoganuara, por që janë duke u demoluar

Disa nga bashkatdhetarët që kanë ardhur me vetura në Kosovë, janë kthyer me aeroplan duke e shitur veturat në vendlindje. Një pjesë e tyre kanë shkuar në të ashtuquajturat varreza, për t’i shitur copa-copa. Mirëpo kjo mënyrë e shit-blerjes ka shqetësuar  institucionet, pasi që veturat po shiten pa u zhdoganuar.

Brenda një dite, Doganat e Kosovës kanë kontrolluar disa pika të shitjes së pjesëve të veturave, dhe kanë arritur t’i zbulojnë disa vetura të pa zhdoganuara, por që janë duke u demoluar, raporton KTV.

Informatat e marra i janë dërguar sektorit adekuat për këtë çështje, i cili pastaj duhet të dalë me vendim rreth vlerës që duhet paguar për ato automjete. Në njërën nga pikat ku janë bërë kontrollet, ekipi mobil ka marrë të dhënat për një veturë të importuar, por që pronarët e auto-pjesëve kanë thënë se janë duke e pritur ç’lajmërimin e veturës nga vendi i origjinës.

Auto-pjesët kanë shumë punë me shitjen e pjesëve të veturave, pasi që për kushtet e pjesës dërrmuese të popullatës, çmimet janë shumë më të përballueshme dhe më të qëndrueshme në krahasim me pjesët e reja që vijnë nga Turqia, Bullgaria aspo së fundi edhe nga Kina.

KTV merr vesh se aksioni ka nisur pasi njësia e inteligjencës ka marrë informata nga qytetarët për shitjen e pjesëve të veturave të pa-zhdoganuara, si dhe pas disa raportimeve në polici të mërgimtarëve që u janë vjedhur veturat.