Pianisti francez Ingmar Lazar mahnit publikun në Chopin Piano Fest Prishtina

Koncerti u mbajt me mbështetjen e Ambasadës së Francës dhe Institutit Francez në Kosovë

Publiku i Prishtinës përjetoi një mbrëmje të veçantë artistike në kuadër të Chopin Piano Fest Prishtina, ku pianisti francez Ingmar Lazar solli një performancë të jashtëzakonshme para adhuruesve të muzikës klasike, transmeton albinfo.ch.

Artisti francez interpretoi vepra të njohura të Chopin, Liszt dhe Mendelssohn, duke i dhuruar publikut një udhëtim të veçantë muzikor dhe emocione të forta artistike.

Ky koncert konfirmoi edhe një herë rëndësinë e Chopin Piano Fest Prishtina si një nga ngjarjet më të rëndësishme të skenës kulturore në Kosovë.

Ngjarja u realizua me mbështetjen e Ambasadës së Francës në Kosovë dhe Institutit Francez të Kosovës.

Me këtë rast, ambasadori i Francës në Kosovë, Olivier Guérot, mori një mirënjohje nga organizatoret e festivalit, Besa Luzha dhe Lejla Pula, për bashkëpunimin dhe mbështetjen e vazhdueshme ndaj festivalit./Albinfo.ch

---