Debati për “10 milionë banorë” në Zvicër: Kush po emigron realisht?

(KEYSTONE/Gian Ehrenzeller)

Debati politik në Zvicër rreth kufirit prej 10 milionë banorësh është rikthyer në qendër të vëmendjes, ndërsa partitë konservatore kërkojnë masa më të ashpra ndaj migracionit. Por statistikat zyrtare tregojnë se pjesa më e madhe e të ardhurve nuk janë azilkërkues, por punëtorë nga vendet e Bashkimit Evropian.

Sipas të dhënave të Sekretariatit Shtetëror për Migracionin (SEM), gjatë vitit 2024 në Zvicër kanë emigruar mbi 89 mijë persona për arsye pune, ndërsa rreth 95% e tyre vinin nga vendet e BE/EFTA. Ndërkohë, bashkimi familjar përbën kategorinë e dytë më të madhe të migracionit, raporton 20min.ch, transmeton albinfo.ch.

Në të njëjtën kohë, migracioni neto në Zvicër ka shënuar rënie krahasuar me vitin paraprak, duke zbritur në rreth 83 mijë persona.

Nisma “Jo një Zvicër me 10 milionë banorë”, e cila pritet të diskutohet në referendum, synon të vendosë kufizime më të forta nëse popullsia kalon pragun prej 9.5 milionë banorësh. Kritikët paralajmërojnë se masa të tilla mund të ndikojnë negativisht në tregun e punës dhe ekonominë zvicerane, e cila varet ndjeshëm nga fuqia punëtore e huaj.