“Brexit-i zviceran”? Referendumi që mund të ndryshojë Zvicrën

Nëse kufiri prej 10 milionësh tejkalohet, Zvicra mund të detyrohet edhe të rishikojë marrëveshjen e lëvizjes së lirë me Bashkimin Evropian

Zvicra po përballet me një debat të madh politik përpara referendumit mbi kufizimin e popullsisë në maksimum 10 milionë banorë deri në vitin 2050 – një votim që shumë analistë po e krahasojnë me Brexit-in britanik.

Iniciativa e promovuar nga partia e djathtë Partia Popullore Zvicerane synon të frenojë imigracionin dhe të detyrojë qeverinë të ndërmarrë masa të ashpra nëse popullsia kalon pragun prej 9.5 milionë banorësh.

Nëse kufiri prej 10 milionësh tejkalohet, Zvicra mund të detyrohet edhe të rishikojë marrëveshjen e lëvizjes së lirë me Bashkimin Evropian, transmeton albinfo.ch.

Mbështetësit e iniciativës argumentojnë se rritja e shpejtë e popullsisë po shkakton krizë banesash, presion mbi transportin publik dhe mbingarkesë të infrastrukturës. Në disa rajone, çmimet e banesave janë rritur ndjeshëm dhe qytetarët ankohen për cilësinë e jetesës.

Nga ana tjetër, qeveria zvicerane dhe bizneset paralajmërojnë se kufizimi i emigracionit mund të dëmtojë ekonominë, të krijojë mungesë fuqie punëtore dhe të rrezikojë marrëdhëniet ekonomike me BE-në.

Sektorë si shëndetësia, ndërtimtaria dhe hoteleria varen shumë nga punëtorët e huaj.

Sondazhet tregojnë se opinioni publik është pothuajse i ndarë në mes, duke e bërë referendumin një nga votimet më të rëndësishme politike në Zvicër vitet e fundit.

 

 

---