Pezullohen fluturimet në Aeroportin e Munihut pas raportimeve për dronë

Autoritetet gjermane mbyllën pistat e aeroportit pasi dy pilotë raportuan se kishin parë një dron pranë zonës së fluturimeve

Fluturimet në Aeroportin e Munihut janë pezulluar të shtunën në mëngjes, pasi autoritetet gjermane morën raportime për praninë e një droni në afërsi të aeroportit, transmeton albinfo.ch.

Sipas raportimeve të Reuters, rreth orës 09:00 aeroporti u ndal plotësisht, duke bërë që asnjë fluturim të mos mund të operonte.

Një numër i madh i forcave policore janë angazhuar në terren, ndërsa autoritetet po hetojnë rastin dhe po kërkojnë pajisjen fluturuese të dyshuar. Ende nuk është bërë e ditur se sa do të zgjasë pezullimi i trafikut ajror.

Një zëdhënës i Policisë tha se dy pilotë kishin raportuar se kishin vërejtur një dron gjatë fluturimit.

“Në koordinim me kontrollin e trafikut ajror, autoritetet e sigurisë vendosën të mbyllnin pistat”, deklaroi ai.

Ky nuk është rasti i parë i tillë në Aeroportin e Munihut. Në tetor të vitit të kaluar, aeroporti ishte mbyllur dy herë brenda 24 orëve për shkak të raportimeve të ngjashme për dronë të dyshimtë pranë zonës së operimit të avionëve./Albinfo.ch

---