Skip to content

Gjermani: 18-vjeçari dyshohet se planifikonte sulm ndaj një xhamie me armë të prodhuara me printer 3D

Keystone SDA

I riu nga landi Nordrhein-Westfalen dyshohet se kishte përgatitur një sulm me motive ekstremiste të djathta ndaj besimtarëve myslimanë. Sipas prokurorisë, ai synonte ta realizonte atë mes fundit të vitit 2026 dhe fillimit të vitit 2027.

Një 18-vjeçar nga Eslohe, në landin Nordrhein-Westfalen të Gjermanisë, dyshohet se po planifikonte një sulm të armatosur ndaj besimtarëve myslimanë në një xhami, duke përdorur armë të prodhuara me printer 3D. Rasti është bërë publik nga Prokuroria e Përgjithshme në Dyseldorf, përcjell albinfo.ch.

Sipas autoriteteve, ekzistojnë dyshime të bazuara se i riu kishte planifikuar ta realizonte sulmin në periudhën nga fundi i vitit 2026 deri në fillim të vitit 2027. Për arsye sigurie, prokuroria nuk ka bërë të ditur se cila xhami ishte cak i mundshëm.

I dyshuari ishte arrestuar në gusht, pasi hetuesit kishin marrë informacione nga persona të afërt me të. Që nga arrestimi, ai ndodhet në paraburgim.

Prokurorja e lartë, Aleksandra Wiese, ka deklaruar për transmetuesin publik WDR se hetuesit kanë gjetur indicie që tregojnë për bindje ekstremiste të djathta te 18-vjeçari. Sipas saj, ky është rasti i parë në të cilin Prokuroria e Përgjithshme e Dyseldorfit po heton plane konkrete për një sulm me armë të prodhuara përmes printerit 3D.

Ndërkohë, hetimet po vazhdojnë për të përcaktuar nëse i riu kishte vepruar i vetëm apo kishte pasur persona të tjerë të përfshirë në planifikimin e sulmit.

Deri më tani nuk është ngritur aktakuzë ndaj tij. Prokuroria ka theksuar se, deri në përfundimin e procedurave hetimore, duhet të respektohet prezumimi i pafajësisë./Albinfo.de