Në Bülach u shënua 621-vjetori i lindjes së Gjergj Kastriotit – Skënderbeut

Bülach, Zvicër – Nën organizimin e Shoqatës “Gjergj Kastrioti” Zvicër, të dielën u mbajt manifestimi kulturor dhe sportiv kushtuar 621-vjetorit të lindjes së Heroit Kombëtar, Gjergj Kastrioti – Skënderbeu. Aktiviteti mblodhi qindra pjesëtarë të komunitetit shqiptar në Zvicër dhe u përmbyll me turneun ndërkombëtar të mundjes së duarve “Gjergji i Pamposhtur”.

Programi nisi me intonimin e Himnit Kombëtar dhe interpretimin artistik “Kushtrimi i Skënderbeut” nga këngëtarja Fjolla Berisha. Të pranishmit i përshëndeti kryetari i Shoqatës “Gjergj Kastrioti”, Agim Pepaj, ndërsa në emër të përfaqësive diplomatike të Shqipërisë, Kosovës dhe Maqedonisë së Veriut në Zvicër foli Konsulli i Republikës së Kosovës në Cyrih, Vigan Berisha.

Pjesa kulturore e manifestimit përfshiu recitime nga nxënësit Nerona Uka dhe Jon Sabriu, si dhe paraqitjen e Ansamblit “Vatra” me tablonë koreografike “Liria ka Emër”. Në program morën pjesë edhe nxënës të Shkollës Shqipe LAPSH.

Një segment i veçantë iu kushtua historisë dhe studimeve për Skenderbeun, Historiani Paulin Zefi mbajti kumtesën me temë “Fuqia e Gjergjit”, duke trajtuar aspekte të figurës dhe trashëgimisë së Skënderbeut. Pas kumtesës, Fjolla Berisha interpretoi këngën “Albulena”.

Pas përfundimit të programit artistik dhe kulturor, nisi turneu “Gjergji i Pamposhtur”, i zhvilluar në kategoritë e meshkujve dhe femrave. Në garë morën pjesë sportistë dhe entuziastë të mundjes së duarve nga vende të ndryshme evropiane. Paralelisht me aktivitetet sportive, organizatorët zhvilluan punëtori arti dhe aktivitete edukative për fëmijët. Punëtorinë artistike e udhëhoqi artisti Refki Gollopeni, duke krijuar hapësira kreative për pjesëmarrësit më të vegjël.

Kryetari i shoqatës, Agim Pepaj, tha se manifestimi u organizua në kuadër të shënimit të 621-vjetorit të lindjes së Skënderbeut dhe se koncepti i turneut “Gjergji i Pamposhtur” synon të promovojë vlerat e forcës, qëndrueshmërisë dhe disiplinës përmes sportit.

Në përfundim të aktivitetit, organizatorët ndanë medalje për garuesit e turneut, si dhe certifikata mirënjohjeje për pjesëmarrësit, sponsorët dhe mbështetësit që kontribuuan në realizimin e manifestimit.

Shoqata “Gjergj Kastrioti” Zvicër falënderoi pjesëmarrësit, vullnetarët, sponsorët dhe mysafirët për kontributin e tyre në organizimin e kësaj veprimtarie kushtuar figurës së Gjergj Kastriotit – Skënderbeut.

 

 

---