Këngëtarja shqiptare me famë botërore, Dua Lipa, është bërë pjesë e një trendi viral në rrjetet sociale, pasi një fotografi e saj është cilësuar nga fansat si fotografia më e bukur e pasaportës në botë, përcjell albinfo.ch.
Fotografia, e realizuar para një sfilate të shtëpisë së njohur të modës “Versace”, ka tërhequr vëmendjen për paraqitjen elegante të artistes, e cila duket sikur po pozon për kopertinën e një reviste mode dhe jo për një dokument identifikimi.
Imazhi është shpërndarë gjerësisht në rrjetet sociale, ku fansat kanë komentuar me humor pamjen e saj dhe e kanë cilësuar si një nga fotografitë më të veçanta të këtij lloji.
Edhe Dua Lipa iu bashkua shakasë, duke e ripublikuar fotografinë më 17 janar 2025, me mbishkrimin: “E dini që aeroportet nuk gëzohen kur më shohin duke ardhur”.
Komenti i artistes lidhej me udhëtimet e saj të shpeshta ndërkombëtare, të cilat janë pjesë e angazhimeve profesionale dhe jetës së saj si një prej yjeve më të njohura të muzikës botërore.
Fotografia vazhdon të komentohet në rrjetet sociale, ndërsa fansat duket se kanë gjetur një arsye tjetër për ta veçuar stilin dhe elegancën e këngëtares shqiptare./Albinfo.ch
