Besimtarët e parë nisen për Haxh

Sipas një njoftimi lëshuar nga Bashkësia Islame e Kosovës, sivjet pelegrinazhin pritet ta kryejnë 867 besimtarë kosovarë

Nga Aeroporti Ndërkombëtar “Ademi Jashari”, sot kanë udhëtuar për në Arabinë Saudite grupi i parë i besimtarëve kosovarë, të cilët sivjet do ta kryejnë pelegrinazhin në Mekë e Medinë. Për t’i përcjellë ata, në Aeroport ishte edhe myftiu i Kosovës, Naim Tërnava, i cili hanxhinjve të ardhshëm u uroj udhëtim të lehtë dhe kryerjen e pranimin e Haxhit.

Sipas një njoftimi lëshuar nga Bashkësia Islame e Kosovës, sivjet pelegrinazhin pritet ta kryejnë 867 besimtarë kosovarë.

“Kryesia e BIK ka bërë përgatitjet e duhura. Me besimtarët tanë në vendet e shenjte do të jenë edhe 36 udhëheqës, si dhe ekipi mjekësor që do të kujdeset për gjendjen shëndetësore të hanxhinjve”, thuhet në njoftim.

Shkuarja e besimtarëve për në Mekë do të vazhdojë edhe sonte dhe nesër, kur pritet që të udhëtojnë të gjithë besimtarët tanë. Ndërsa besimtarët nga Maqedonia udhëtojnë nga aeroporti i Shkupit, kurse ata të Luginës së Preshevës nga Aeroportin “Nënë Tereza” në Tiranë.