Trump: Sot i dhamë fund luftës me Iranin, trupat do kthehen shumë shpejt në shtëpi

Trump: I dhamë fund konfliktit me Iranin, Teherani pranon të mos zotërojë armë bërthamore

Presidenti i Shteteve të Bashkuara, Donald Trump, ka deklaruar se është arritur një marrëveshje historike me Iranin, duke pretenduar se ajo i ka dhënë fund konfliktit mes dy vendeve dhe ka siguruar angazhimin e Teheranit për të mos zotëruar kurrë armë bërthamore, përcjell albinfo.ch.

Trump i bëri këto komente gjatë një tubimi virtual në mbështetje të kandidatit për Senat, Barry Moore, ku tha se negociatat me Iranin janë përmbyllur me sukses dhe se marrëveshja përmbush kërkesat kryesore të Uashingtonit.

“Nuk e di nëse keni dëgjuar, por sot i dhamë fund luftës me Iranin. Ata ranë dakord që të mos kenë kurrë armë bërthamore, gjë për të cilën ne kemi këmbëngulur. Sot i mbyllëm llogaritë me Iranin. Njerëzit do të fillojnë të kthehen në shtëpi shumë shpejt”, deklaroi Trump para mbështetësve të tij.

Sipas presidentit amerikan, marrëveshja është praktikisht e finalizuar dhe përfshin masa që synojnë kufizimin e programit bërthamor iranian, një çështje që prej vitesh ka qenë në qendër të tensioneve mes Washingtonit dhe Teheranit.

Trump theksoi gjithashtu se një nga rezultatet e kësaj marrëveshjeje do të jetë edhe kthimi gradual i ushtarëve amerikanë në vend, duke e cilësuar zhvillimin si një fitore të rëndësishme diplomatike dhe strategjike për Shtetet e Bashkuara.

Deklaratat e tij vijnë në një kohë kur marrëdhëniet mes SHBA-së dhe Iranit kanë qenë ndër temat më të ndjeshme në politikën ndërkombëtare, ndërsa detaje të tjera rreth marrëveshjes pritet të bëhen publike në ditët në vijim./Albinfo.ch

---