Statistikat nuk favorizojnë Zvicrën para përballjes me Bosnje-Hercegovinën

Zvicra kërkon të thyejë një traditë negative ndaj Bosnje-Hercegovinës

“Helvetikët” kanë pasur vështirësi në ndeshjen e dytë të fazës së grupeve në turnetë e mëdhenj, ndërsa bilanci ndaj Bosnje-Hercegovinës është gjithashtu negativ, transmeton albinfo.ch.

Përballja e së enjtes mes Zvicrës dhe Bosnje-Hercegovinës në Kupën e Botës vjen me statistika që nuk janë në favor të kombëtares zvicerane.

Që nga Botërori i vitit 2014, Zvicra është kualifikuar në fazën e 1/8 së finales në çdo Kampionat Botëror dhe Evropian, një arritje që, përveç saj, e ka realizuar vetëm Franca.

Megjithatë, ndeshja e dytë e fazës së grupeve ka qenë vazhdimisht më problematikja për “helvetikët”. Përjashtimi i vetëm ishte fitorja 2:1 ndaj Serbisë në Botërorin e vitit 2018.

Në turnetë e tjerë, Zvicra pësoi humbje 5:2 ndaj Francës në Botërorin 2014, 3:0 ndaj Italisë në Euro 2021 dhe 1:0 ndaj Brazilit në Botërorin 2022, ndërsa barazoi 1:1 me Rumaninë në Euro 2016 dhe 1:1 me Skocinë në Euro 2024.

Në të gjitha këto raste, kombëtarja zvicerane u detyrua të luftonte deri në ndeshjen e fundit të grupit për të siguruar kualifikimin.

Edhe historia e përballjeve me Bosnje-Hercegovinën nuk është në favor të Zvicrës. Dy ekipet janë takuar vetëm një herë, në një ndeshje miqësore në vitin 2016 në Cyrih, ku Bosnja fitoi me rezultatin 2:0.

Në atë takim për Zvicrën luanin edhe Granit Xhaka, Ricardo Rodriguez, Breel Embolo, Nico Elvedi dhe Silvan Widmer, ndërsa Bosnja udhëhiqej nga kapiteni Edin Džeko.

Të enjten në Los Anxhelos, Zvicra do të synojë të thyejë këtë statistikë negative dhe të hedhë një hap të madh drejt kualifikimit në fazën me eliminim direkt. /Albinfo.ch

---