Digjet resorti i famshëm, evakuohen 1700 pushues

Zjarr tragjik në një resort luksoz, humb jetën një turiste italiane

Rreth 1700 mysafirë u evakuuan pas shpërthimit të flakëve në një resort bregdetar në Bayahibe, ndërsa autoritetet po hetojnë shkaqet e incidentit, përcjell albinfo.ch.

Një zjarr i fuqishëm ka përfshirë një resort luksoz bregdetar në Republikën Domenikane, duke shkaktuar vdekjen e një turisteje italiane dhe evakuimin e rreth 1700 mysafirëve.

Sipas autoriteteve lokale të emergjencës, viktima është një grua 46-vjeçare nga Italia. Tre persona të tjerë janë dërguar për trajtim në spital, ndërsa gjashtë të tjerë kanë marrë ndihmë mjekësore në vendngjarje.

Flakët shpërthyen në orët e para të mëngjesit në resortin “Viva Wyndham Dominicus Beach” në Bayahibe, një nga destinacionet më të njohura turistike në Karaibe.

Pamjet ajrore treguan disa ndërtesa të përfshira nga zjarri dhe re të dendura tymi që mbuluan zonën turistike. Sipas hetimeve paraprake, zjarri u përhap me shpejtësi për shkak të erërave të forta dhe kulmeve prej kashte në disa objekte të resortit.

Autoritetet njoftuan se zjarri tashmë është vënë nën kontroll dhe të gjithë mysafirët janë transferuar në hotele të tjera. Ndërkohë, shkaku i saktë i shpërthimit të flakëve mbetet ende i paqartë dhe po hetohet nga organet kompetente.

Ambasada italiane në Republikën Domenikane po ndihmon qindra turistë italianë të prekur nga incidenti, duke siguruar dokumente emergjente udhëtimi dhe organizuar kthimin e tyre në Itali.

Bayahibe njihet si një prej perlave turistike të Karaibeve, e famshme për plazhet me rërë të bardhë dhe ujërat e kristalta që tërheqin mijëra vizitorë çdo vit./Albinfo.ch

---