Pacientët me sëmundje të rralla në Europë pa mbështetje psikologjike

Një sondazh i realizuar nga një organizatë europiane për sëmundjet e rralla, me rreth 10 mijë pacientë dhe kujdestarë në 45 vende të Europës, tregon se shumica e personave që jetojnë me këto sëmundje nuk marrin ndihmën psikologjike që u nevojitet.

Sipas rezultateve, rreth 7 në 10 pacientë dhe kujdestarë përballen me vështirësi të shëndetit mendor. Ata raportojnë nivele shumë më të larta të depresionit dhe ankthit krahasuar me popullsinë e përgjithshme, ndërsa ndjenja e vetmisë është shumë më e theksuar. Gjithashtu, mendimet vetëvrasëse rezultojnë dukshëm më të shpeshta.

Pavarësisht nevojës së madhe për mbështetje psikologjike, vetëm gjysma e të anketuarve kanë arritur ta marrin këtë ndihmë në gjashtë muajt e fundit. Ndër pengesat kryesore përmenden kostot e larta, listat e gjata të pritjes, distanca nga shërbimet dhe mungesa e informacionit.

Ekspertët e cilësojnë situatën si një krizë serioze të shëndetit mendor dhe kërkojnë që mbështetja psikologjike të përfshihet si pjesë thelbësore e trajtimit për pacientët me sëmundje të rralla në të gjitha fazat e kujdesit shëndetësor.