Pesë studente të Departamentit të Dizajnit të Modës kanë përfaqësuar me sukses Kosovën në ngjarjen prestigjioze ndërkombëtare të modës “Sotto il Cielo di Genzano 2026”, e mbajtur në Romë të Italisë, transmeton albinfo.ch.
Përmes koleksioneve dhe koncepteve të tyre kreative, studentet prezantuan talentin dhe vizionin e dizajnit kosovar para një audience ndërkombëtare, duke dëshmuar potencialin e brezit të ri të dizajnereve nga Kosova.
Suksesi më i madh u arrit nga studentja Adile Jashari, e cila fitoi vendin e parë në kategorinë “Ricerca Stilistica” (Kërkim Stilistik), një çmim që vlerëson origjinalitetin, hulumtimin krijues dhe qasjen inovative në dizajn.
Ky vlerësim e renditi Adilen ndër emrat më të spikatur të garës, ku morën pjesë konkurrentë nga vende të ndryshme të botës, duke konfirmuar nivelin profesional dhe kreativ të studentëve të UBT-së në skenën ndërkombëtare.
Përveç saj, edhe katër studente të tjera të Departamentit të Dizajnit të Modës prezantuan punimet e tyre para profesionistëve dhe dashamirëve të modës, duke promovuar kulturën, identitetin dhe krijimtarinë artistike të Kosovës.
Sipas UBT-së, pjesëmarrja dhe suksesi në “Sotto il Cielo di Genzano 2026” pasqyrojnë angazhimin e institucionit për zhvillimin e talenteve të reja dhe krijimin e mundësive që studentët të prezantojnë punën e tyre në ngjarje prestigjioze ndërkombëtare./Albinfo.ch
