Spanja shkon në çerekfinale pas dramës me Portugalinë

Portugal's Cristiano Ronaldo (7) runs with the ball among Spain's Eric Garcia (4), left, and Pedri (20) during the World Cup round of 16 soccer match between Portugal and Spain in Arlington, Texas, near Dallas, Monday, July 6, 2026. (AP Photo/Jessica Tobias)

Spanja ka siguruar një vend në çerekfinalet e Kupës së Botës 2026 pas një fitoreje dramatike ndaj Portugalisë me rezultat 1:0. Heroi i ndeshjes ishte Mikel Merino, i cili shënoi golin vendimtar në minutën e 91-të, duke i dhënë skuadrës së Luis de la Fuente kualifikimin.

Përballja mes dy rivalëve iberikë në stadiumin e Dallasit ishte e luftuar dhe me shumë tension. Pjesa e parë solli një lojë më të hapur, me të dyja skuadrat që patën raste të mira shënimi, por portierët dhe mungesa e saktësisë bënë që ekipet të shkonin në pushim me rezultatin 0:0.

Spanja ishte pranë golit në minutën e 8-të, kur Mikel Oyarzabal doli përballë portierit portugez Diogo Costa, por goditja e tij përfundoi jashtë. Portugalia reagoi dhe pati rastin më të mirë në fundin e pjesës së parë, kur Nuno Mendes goditi traversën pas një aksioni nga goditja e këndit.

Në pjesën e dytë, ritmi ra disi dhe ndeshja dukej se po shkonte drejt vazhdimeve. Portugalia u përpoq të ushtronte presion, ndërsa Spanja kërkonte hapësira përmes posedimit të topit dhe aksioneve të shpejta.

Momenti vendimtar erdhi në minutën e 91-të. Pas një goditjeje të lirë të ekzekutuar shpejt, Ferran Torres dha një pasim të shkëlqyer në thellësi për Mikel Merinon, i cili doli i vetëm përballë portierit Diogo Costa dhe realizoi për 1:0.

Portugalia tentoi të barazonte në minutat e fundit dhe Bernardo Silva pati një mundësi të artë me kokë në shtesë, por topi përfundoi mbi portë.

Me këtë fitore, Spanja kalon në çerekfinale, ku do të përballet me fituesin e duelit mes SHBA-së dhe Belgjikës. Ndeshja e radhës për “Furinë e Kuqe” do të zhvillohet më 10 korrik.