Ndihma sllovene për Ministrinë e Diasporës

Dy ministrat, Murati dhe Zhmavc konstatuan se për vendet si Kosova dhe Sllovenia, bashkëpunimi dhe mbajtja e lidhjeve me diasporën është jetike

Ministri i Diasporës, Valon Murati gjatë qëndrimit në Slloveni, u takua me ministrin e shtetit Slloven për diasporë, Gorazd Zhmavc, me të cilin diskutuan mundësitë më të mira të bashkëpunimit në fushën e mërgatës e diasporës. Në këtë takim ishin të pranishëm edhe përfaqësuesit e Ministrisë sllovene të Arsimit.

Në kuadër të vazhdimit të mëtejmë të bashkëpunimit të ndërsjellë, ministri Murati e ftoi homologun e tij slloven për një vizitë zyrtare në Prishtinë gjatë këtij viti.

Si rezultat i takimit dy ministrat konstatuan se për vendet si Kosova dhe Sllovenia, bashkëpunimi dhe mbajtja e lidhjeve me diasporën është jetike, thuhet në komunikatën për media lëshuar nga MeD, raporton albinfo.ch.

Pas njoftimin nga ministri Murati për punën që Ministria e Diasporës të cilën e udhëheq është duke bërë në fusha të ndryshme, ministri Zhmavc e përgëzoi ministrin Murati për punën e mire, sidomos për aktivitetet e rrjetëzimit të kategorive të ndryshme profesionale të diasporës.

Në këtë takim ishin prezent edhe përfaqësues të Ministrisë së Arsimit, Shkencës dhe Sportit të Sllovenisë ku me ta u diskutua përkrahja e shtetit Slloven për mësimin plotësues të gjuhës dhe kulturës shqipe në Slloveni, sidomos në ato zona ku është më e koncentruar diaspora jonë.

Ne këtë takim ministri Murati u shoqërua nga Ambasadori i Kosovës ne Slloveni, Nexhmi Rexhepi.