Thatësira po përhapet në Evropë, ndryshimet klimatike rrisin ndikimin e temperaturave ekstreme

Keystone (AP Photo/Emilio Morenatti, File)

Një studim i realizuar nga grupi ndërkombëtar i kërkuesve World Weather Attribution ka evidentuar se rritja e temperaturave si pasojë e ndryshimeve klimatike po përkeqëson ndjeshëm kushtet e thatësirës në Evropë.

Sipas studiuesve, problemi kryesor nuk lidhet vetëm me mungesën e reshjeve, por me nxehtësinë ekstreme që po përshpejton avullimin dhe humbjen e lagështisë nga toka, liqenet dhe lumenjtë.

Gjatë kësaj vere, disa vende evropiane po përballen me pasoja të rënda. Në Francë priten të korra shumë të ulëta të misrit, ndërsa Rumania ka vendosur kufizime për përdorimin e ujit për ujitje nga fermerët. Holanda ka paralajmëruar për mungesë uji, ndërsa disa ishuj grekë kanë shpallur gjendje emergjente për të menaxhuar rezervat ujore.

Ekspertët theksojnë se edhe në zonat ku reshjet nuk kanë pësuar rënie të madhe ose pritet të shtohen në periudha të caktuara të vitit, rreziku nga thatësira mbetet në rritje për shkak të temperaturave të larta.

“Rezultatet tona tregojnë se kjo thatësirë nuk është vetëm pasojë e reshjeve të pakta, por kryesisht e një atmosfere më të ngrohtë që po shkakton mungesë më të madhe lagështie në tokë”, deklaroi Zachariah nga Imperial College London.

Studimi ka arritur në përfundimin se tokat jashtëzakonisht të thata janë bërë shumë më të zakonshme krahasuar me një skenar pa ndikimin e ndryshimeve klimatike: rreth pesë herë më të mundshme në Evropën Perëndimore dhe deri në 11 herë më të mundshme në Evropën Lindore.

Studiuesit paralajmërojnë se rritja e temperaturave do të vazhdojë të ndikojë në burimet ujore, bujqësi dhe ekosistemet evropiane në vitet e ardhshme.