Prodhuesi gjerman i automjeteve BMW pritet të shkurtojë rreth 8 mijë vende pune, kryesisht në Gjermani, si pjesë e një programi për uljen e kostove, i nxitur nga dobësimi i tregut kinez dhe rritja e presioneve financiare, transmeton albinfo.ch.
Sipas raportimeve të mediave gjermane, pas disa javësh negociatash është arritur një marrëveshje mes menaxhmentit të kompanisë dhe përfaqësuesve të punonjësve për zbatimin e një programi të largimeve vullnetare nga puna.
Procesi i reduktimit të stafit pritet të nisë në tetor të vitit 2026 dhe të zgjasë deri në fund të vitit 2027, me synimin për të ulur numrin e të punësuarve me rreth 8 mijë persona.
Ky vendim vjen në një periudhë sfiduese për industrinë automobilistike, e cila po përballet me rënien e kërkesës në tregun kinez, rritjen e kostove të prodhimit dhe konkurrencën gjithnjë e më të fortë në sektorin e automjeteve elektrike./Albinfo.ch