Italia pritet të lirojë mijëra të burgosur, nuk ka vend në burgje

(KEYSTONE/Peter Schneider)

Parlamenti italian ka miratuar një ligj të ri që synon të ulë mbipopullimin në burgjet e vendit. Sipas kësaj reforme, mijëra persona të dënuar që vuajnë nga varësia ndaj drogës ose alkoolit mund të kenë mundësinë të kryejnë dënimin në banesat e tyre, duke ndjekur njëkohësisht programe rehabilitimi.

Burgjet në Itali aktualisht janë të tejmbushura dhe funksionojnë me rreth 140% të kapacitetit të tyre, duke e renditur vendin ndër shtetet me problemet më të mëdha të mbipopullimit të burgjeve në Bashkimin Evropian.

Ministri italian i Drejtësisë, Carlo Nordio, deklaroi se masa mund të prekë mbi 10 mijë të burgosur me probleme të varësisë nga droga, ndërsa mijëra të tjerë me varësi nga alkooli mund të përfitojnë gjithashtu nga kjo mundësi.

Megjithatë, organizata për të drejtat e të burgosurve “Antigone” ka shprehur dyshime për numrin real të personave që mund të lirohen, duke theksuar se zbatimi i ligjit do të varet nga disa kushte dhe nga kapacitetet e qendrave të rehabilitimit.

Kryeministrja italiane Giorgia Meloni e ka cilësuar këtë reformë si një hap të rëndësishëm, që sipas saj do të ndihmojë në uljen e presionit mbi sistemin e burgjeve dhe në riintegrimin e personave me varësi, duke i larguar ata nga rruga e kriminalitetit.

Qeveria italiane ka premtuar më herët edhe ndërtimin e vendeve të reja në burgje, por deri tani nuk është shtuar kapacitet i ri. Reforma mbetet një çështje e ndjeshme politikisht, veçanërisht për shkak të debateve mbi sigurinë dhe luftën kundër krimit/albinfo.ch/