Prapë e gjuajnë me vezë kryeministrin Mustafa

Gjatë kohës kur kryeministri Isa Mustafa po mbante një fjalim për shënimin e Ditës së Mjedrës në Podujevë, ai u gjuajt me vezë nga aktivistët e Lëvizjes Vetëvendosje

Aktivistët e Lëvizjes Vetëvendosje sërish e kanë gjuajtur me vezë kryeministrin Isa Mustafa, derisa ai po mbante një fjalim në Podujevë. Aktivistët e LVV kësaj here kanë shkuar në rajonin e Llapit, ku kryeministri kosovar po merrte pjesë në shënimin e Ditës së Mjedrës. Pas kësaj akti ka ndërhyrë Policia e cila ka arrestuar dy aktivit të kësaj lëvizje.

Gjuajtja me vezë ndaj kryeministri vjen si rezultat i pakënaqësisë pas nënshkrimit të dy marrëveshjeve të fundit, njërën me Serbinë për Asociacionin e Komunave me shumicë serbe dhe tjetrën me Malin e Zi, për demarkacionin e kufirit. Sipas opozitës, Mustafa ka shkelur rëndë integritetin e shtetit.

Në deklaratën e Vetëvendosjes thuhet se nuk do të lejojnë funksionimin normal të qeverisë së udhëhequr nga kryeministri Muustafa, pa u tërhequr nënshkrimi nga marrëveshjet e fundit.

“Isa Mustafa po e mbron me çdo kusht “Zajednicën” e tij. Edhe kur zyrtarët e Serbisë, me të cilët ai ka bërë marrëveshje, e quajnë vendin tonë ISIS dhe e pengojnë në çdo nismë ndërkombëtare. Isa Mustafa vazhdon të jetë i përbetuar ndaj “Zajednicës””, thuhet në deklaratën e Vetëvendosjes.