Nën dyshimet për krime lufte arrestohet Xhemshit Krasniqi

Pas pesë vjet në arrati, policia e EULEX-it në Kosovë ka arrestuar të akuzuarit të krime lufte, Xhemshit Krasniqi

Pas më shumë se pesë vjet në arrati, Policia e EULEX-it (Misioni i BE-së për Sundim të Ligjit), kanë arrestuar në Prizren Xhemshit Krasniqin, luftëtarin dhe eprorin e ish-Ushtrisë Çlirimtare të Kosovës (UÇK), nën dyshimin se ka kryer krime të luftës gjatë vitit 1999 në rajonin e Kukësit dhe Prizrenit.

“Ne mund të konfirmojmë se zoti Krasniqi është arrestuar nga EXPOL (Policia e EULEX-it) sot. I akuzuari po transportohet në këto momente në një qendër mbajtjeje. Më shumë detaje do të japim nesër”, thuhet në një përgjigje të zëdhënëses, Dragana Nikolic – Salomon.

Ndryshe, në maj të vitit 2010-të, policia e EULEX-it bastisi shtëpinë Xhemshit Krasniqit në Prizren, por nuk arriti ta arrestonte atë. Që nga ajo periudhë, Krasniqi i është shmangur misionit EULEX, deri në ditën e djeshme, kur edhe u arrestua dhe u dërgua në paraburgim.

Për Krasniqin, thuhet se ekziston dyshimi se ka shkelur kodet e luftës, duke bërë krime lufte kundër popullsisë civile, që supozohet të jenë kryer në Qendrat e UÇK-së të vendosura në Kukës dhe Cahan (Shqipëri) gjatë periudhës prillit-qershor të viti 1999. Policia rajonale e Kosovës nuk ka asnjë informatë rreth këtij rasti.