Kurti pret të ngarkuarën me punë të Ambasadës amerikane në Prishtinë

Në takim u diskutua për marrëdhëniet Kosovë-SHBA, zhvillimet politike dhe mundësitë për thellimin e bashkëpunimit ekonomik

Kryeministri i Kosovës, Albin Kurti, ka pritur në takim të ngarkuarën me punë të Ambasadës së Shteteve të Bashkuara në Prishtinë, Anu Prattipati, përcjell albinfo.ch.

Sipas Zyrës së Kryeministrit, gjatë takimit është diskutuar për marrëdhëniet ndërmjet Kosovës dhe Shteteve të Bashkuara, mundësitë për zgjerimin e bashkëpunimit, si dhe zhvillimet e fundit politike në vend.

Prattipati, sipas njoftimit, e ka uruar Kurtin për formimin e Qeverisë dhe fillimin e mandatit të ri.

Kurti e ka falënderuar për urimet dhe ka shprehur mirënjohje për mbështetjen e vazhdueshme të Shteteve të Bashkuara ndaj Kosovës.

Për takimin ka njoftuar edhe Ambasada e SHBA-së në Prishtinë. Sipas njoftimit të saj, diskutimet u përqendruan në mundësitë për avancimin e mëtejshëm të bashkëpunimit ndërmjet dy vendeve.

Në veçanti, ambasada amerikane ka veçuar forcimin e partneritetit tregtar dhe investues, si dhe bashkëpunimin në prioritetet e përbashkëta që lidhen me paqen dhe stabilitetin në rajon.

Takimi vjen në një periudhë të zhvillimeve të rëndësishme politike në Kosovë, ndërsa çështja e funksionimit të institucioneve dhe zhvillimet e ardhshme politike mbeten në fokus./Albinfo.ch

---