Kallas: Me sulmet hibride, Rusia po rrezikon jetët në Evropë

Foto FB: Kaja Kallas

Shefja e politikës së jashtme të Bashkimit Evropian, Kaja Kallas ka deklaruar se Rusia po rrezikon jetët në Evropë përmes sulmeve hibride, përfshirë sabotimet dhe shkeljet e hapësirës ajrore.

Kallas tha se në javët e fundit është shënuar rritje e sulmeve hibride dhe përpjekjeve për sabotim që i atribuohen Rusisë teksa shtoi se raketat dhe dronët rusë kanë shkelur sërish hapësirën ajrore të Moldavisë gjatë fundjavës, duke e cilësuar këtë si të papranueshme, raporton Reuters.

Nga ana tjetër, Ministria e Mbrojtjes e Moldavisë njoftoi se tre dronë kishin hyrë në hapësirën ajrore të vendit teksa kancelari gjerman Friedrich Merz paralajmëroi javën e kaluar për rritje të sulmeve hibride ruse ndaj Gjermanisë, transmeton albinfo.ch.

Autoritetet gjermane kanë paralajmëruar vazhdimisht për një fushatë hibride ruse, që sipas tyre përfshin sulme me dronë dhe sulme kibernetike. Berlini e ka akuzuar Moskën edhe për një përpjekje për sulm me dron në aeroportin e Leipzigut në muajin gusht.

Moska i ka mohuar akuzat e qeverive perëndimore dhe shërbimeve të inteligjencës se qëndron pas këtyre sulmeve.