PDK: Miratimi i Ligjit për Specialen nuk duhet të kushtëzohet me zgjedhjen e presidentit

Shefi i Grupit Parlamentar të PDK-së, Arian Tahiri, dhe nënkryetarja e Kuvendit Vlora Çitaku, kanë kërkuar që Kuvendi i Kosovës të procedojë me leximin e dytë të ndryshimeve në Ligjin për Dhomat e Specializuara.

Tahiri tha se miratimi i ligjit është përgjegjësi e të gjitha forcave politike dhe deputetëve, duke kundërshtuar lidhjen e kësaj çështjeje me zgjedhjen e presidentit.

“Është obligim dhe përgjegjësi kombëtare e secilës forcë politike dhe e secilit deputet me miratu ligjin edhe në leximin e dytë”, deklaroi Tahiri. Ai shtoi se formula “votoma presidentin, ta votoj ligjin” është, sipas tij, e pandershme.

Edhe Vlora Çitaku ka theksuar se çështja e Ligjit për Specialen duhet të trajtohet veçmas nga ajo e presidentit.

“Çështja e ligjit dhe çështja e presidentit janë të ndara. Votimi i ligjit është detyrim jo vetëm politik, por edhe kombëtar. Çështja e presidentit është çështje e marrëveshjes, janë totalisht të ndara”, tha Çitaku.

Çitaku u ka bërë thirrje të gjithë deputetëve që të kthehen në sallën plenare dhe të votojnë në lexim të dytë ndryshimet ligjore. Ajo ka deklaruar gjithashtu se deputetët e PDK-së do të qëndrojnë në Kuvend derisa të trajtohet kjo çështje.

Kuvendi i Kosovës i ka miratuar më herët, ndryshimet në ligj në lexim të parë, ndërsa votimi në lexim të dytë mbetet në qendër të përplasjes politike mes partive.