Një medium në gjuhën shqipe, në Zvicër që i drejtohet në radhë të parë komunitetit të këtushëm shqiptar ka qenë nevojë e kahershme e komunitetit. Jo se mungonin mediat por sepse nevoja ishte më shumë për ato media që lidhin komunitetin me vendin ku jeton, që ndihmojnë integrimin. Por sigurisht, një integrim me vlera, i kundërt me asimilimin.
Platforma mediale Albinfo.ch, prandaj, ishte një përgjigje e duhur dhe në kohë për nevojat në rritje të komunitetit për informim cilësor, profesional dhe të paanshëm. Nga fillimi i punës së saj ajo dha shenjat për lindjen e një platforme që lidh, bashkon dhe përfaqëson interesat e shqiptarëve në Zvicër e më gjerë, gjithmonë duke i ndërlidhur ato me ambientin ku ata jetojnë.
Një simbiozë në mes të pasqyrimit të realitetit në diasporë dhe të vendit të prejardhjes, një balancim i lajmeve nga diaspora, nga shteti ku ajo është vendosur dhe nga atdheu. Kjo ishte dhe vazhdon të jetë pikësynimi i atyre që ndërtuan këtë platformë dhe jo krijimi apo ushqimi i aferave, sensacionalizmi dhe folklorizimi i realitetit. Dhe kjo sigurisht i ka krijuar platformës sonë atë shëmbëlltyrën e medias serioze dhe të besueshme.
Mbrojtja e qasjes profesionale në raport me informacionin dhe shmangia e sensacionales nuk ka qenë asnjëherë e lehtë dhe vazhdon të mos jetë. Ajo kërkon një drejtpeshim dhe një shikim të esëllt, përtej trivialitetit që shpesh imponon ambienti ku jetojmë. Prandaj albinfos i është dashur një mbështetje në vlerat e qëndrueshme, të vërteta, mbështetje që gjithmonë nënkupton edhe përballje me sfida jo të lehta.
E themeluar fillimisht me mbështetjen institucionale të Zvicrës, platforma jonë tashmë disa vite jeton me forca të veta. Mbijetesa e saj në kushte të një tregu jo shumë të përshtatshëm tregon edhe fuqinë Albinfo.ch, seriozitetin dhe rrjedhimisht, besimin që komuniteti shqiptar i Zvicrës ka për të. Ky është një tregues i qartë për shkallën e lartë të identifikimit të këtij komuniteti me platformën mediale Albinfo.ch e cila që nga fillimi ka marrë rolin e zërit të shqiptarëve të Zvicrës e më gjerë. Një zëri të fuqishëm por gjithmonë larg zhurmave dhe kakofonisë që shpesh dinë të krijojnë mediat rreth vetes.
albinfo.ch tani që ka mbushur mbi 15 vite jetë vazhdon të përballet me sfida që imponon realiteti medial shqiptar dhe më gjerë. Në kushtet e një peizazhi të egër të rrjeteve sociale që shpesh marrin rolin jo vetëm të mediave por edhe të gjyqeve dhe organeve ndjekëse, të qëndrosh si medium, për më tepër medium serioz që nuk bie në grackat e manipulimeve, kaq të zakonshme në këtë treg, vetë mbijetesa është një sukses.
Ndërsa platforma mediale Albinfo.ch ka arritur jo vetëm të mbijetojë po të vegjetojë. Ajo po krijon vlera të qëndrueshme që shkojnë larg përtej mbijetesës së thjeshtë. Vlera të saj të shtuara janë edhe magazina (revista e shtypur) me po këtë emër, e cila botohet prej tashmë 12 vitesh. Dhe së fundi, një vlerë e tillë premton të bëhet edhe podcasti (albpodcast), një segment i ri medial që është bërë pjesë e platformës sonë. Me botimin online, atë të shtypur dhe me transmetimin e albpodcastit, Albinfo.ch po bën rrumbullakimin e saj si platformë komplete mediale dhe me një perspektivë premtuese për të ardhmen.
