Kompania „Albi GmbH“ në Salzburg të Austrisë, i dhuroi shkollës „9 Maji“ në Leran të Preshevës, një kabinet të kompletuar me pajisje kompjuterike të teknologjisë së fundit, duke krijuar kushte më të mira për mësim dhe zhvillimin e aftësive digjitale të nxënësve.
Konkretisht, bëhet fjalë për 20 kompjuterë, projektor dhe pajisje të tjera përcjellëse për një kabinet të informatikës për nxënësit e kësaj shkolle në Preshevë, raporton albinfo.at.
Pronari i kësaj kompanie, Shiqeri Emrllahu, thekson se, që nga pas lufta, ky është donacioni i 28-të më radhë, i cili së bashku me partnerët austriak, ka kontribuar me pajisje në shkollat e disa komunave të Kosovës, në kabinete të informatikës, si dhe me mbështetjen e institucioneve shëndetësore, përfshirë edhe pajisje në spitalin rajonal të Gjilanit.
Ai ka nënvizuar se, vendlindja duhet të dëshmohet me vepra, e jo vetëm me fjalë.
„Donacioni synon të krijojë kushte më të mira për mësim dhe t’u mundësojë fëmijëve të Luginës së Preshevës të jenë më afër zhvillimeve dhe trendëve të reja teknologjike“, ka thënë ai.
Mbështetja nga kompania e z.Shiqeri Emrllahut ,vjen si rrjedhojë e bashkëpunimit ndërmjet bizneseve, diasporës dhe institucioneve në Preshevë të cilat sjellin rezultate në dobi të arsimit dhe të ardhmes së fëmijëve shqiptarë.
Donacioni, u realizua si projekt i dalë nga Konferenca IV Ekonomike, e mbajtur më 26 shtator në Bujanoc, me moton “Ekonomia shpëton Luginën“.

