Kompania farmaceutike zvicerane Roche ka publikuar rezultate pozitive nga dy studime klinike të fazës së tretë për ilaçin eksperimental vamikibart, që synon trajtimin e edemës makulare të shkaktuar nga uveiti, një gjendje inflamatore që shkakton ënjtje të makulës, pjesës së retinës përgjegjëse për shikimin e mprehtë.
Sipas rezultateve, trajtimi ka përmirësuar në mënyrë të qëndrueshme shikimin dhe ka zvogëluar ënjtjen e retinës gjatë një periudhe prej 52 javësh. Në të dy studimet, përmirësim të shikimit pati një përqindje më e lartë e pacientëve që morën ilaçin, krahasuar me grupin e kontrollit. Rreth dy të tretat e pacientëve nuk patën nevojë për injeksione të tjera pas fazës fillestare të trajtimit.
Rezultatet u prezantuan të shtunën, në takimin vjetor të Akademisë Amerikane të Oftalmologjisë, në New Orleans.
Ilaçi ende nuk është miratuar për përdorim. Administrata Amerikane e Ushqimit dhe Barnave (FDA) e ka pranuar për shqyrtim aplikimin e Roche-s dhe pritet të marrë vendim deri në korrik të vitit 2027. Aplikime për miratim janë dorëzuar gjithashtu në Bashkimin Evropian, Kinë dhe Japoni.
