Dy të rinj, 18 dhe 19 vjeç, nga kantoni Vaud i Zvicrës, janë arrestuar në aeroportin e Phuketit në Tajlandë, pasi në valixhet e tyre janë zbuluar 16 kilogramë kanabis.
Sipas televizionit publik zviceran RTS, të rinjtë ishin joshur përmes një oferte në Snapchat, e cila u premtonte një udhëtim dyjavor me të gjitha shpenzimet e paguara dhe 8 mijë franga zvicerane në këmbim të transportimit të një valixheje që, sipas rekrutuesve, përmbante telefona iPhone.
Të rinjtë kishin udhëtuar drejt Tajlandës më 13 korrik. Një ditë para kthimit, ata i lanë valixhet në recepsionin e hotelit, me kërkesë të personave që i kishin rekrutuar. Kur i morën sërish, bagazhet ishin ndërruar, por ata nuk dyshuan për përmbajtjen e tyre.
Njëri prej tyre arriti të largohej nga Tajlanda pasi pagoi rreth 18 mijë franga në gjoba dhe shpenzime të tjera. Ndërsa 18-vjeçari ka mbetur i ndaluar në vend dhe pret gjykimin, i cili pritet të nisë në ditët në vijim.
Avokatja e tyre, Thatsanavanh Banchong, paralajmëron se autoritetet tajlandeze janë ashpërsuar ndaj rasteve të transportimit të drogës, me dënime që, varësisht nga rrethanat, mund të arrijnë deri në dhjetë vjet burg.
Sipas RTS-së, fenomeni prek edhe aeroportet evropiane. Në Zvicër, nga 97 korrierët e drogës të arrestuar në aeroportin e Cyrihut ndërmjet janarit dhe tetorit, 73 kishin ardhur nga Tajlanda me kanabis. Në Gjenevë, ndërmjet janarit dhe korrikut 2026, janë arrestuar të paktën 15 persona që vinin nga Bangkoku me më shumë se gjysmë ton kanabis në total.
