Ramë Lahaj së bashku me orkestrën Arma e ka udhëhequr audiencën në një udhëtim muzikor përmes klasikeve ndërkombëtare dhe tingujve të atdheut të tij – emocional, personal dhe plot pasion. Salla e madhe e mbushur përplot e pallatit më të njohur të Cyrihut për organizime të tilla Kongres Haus / Tonhalle ishte treguesi më i mirë për suksesin e koncertit të tenorit me famë ndërkombëtare.
Këngët e përzgjedhura nga repertori ndërkombëtar i muzikës klasike dhe asaj të popullarizuar në gojën e maestros së madh u pritën me duartrokitje frenetike dhe admirim nga publiku. Përjetimet më emocionuese për njerëzit në sallë ishin sigurisht ato që erdhën nga këngët e njohura popullore e të përpunuara të traditës shqiptare.
Këngët si “O vendi im” apo “Luleborë” ngritën në këmbë mbi njëmijë mysafirët në sallë, të cilët me emocione dhe dukshëm të mallëngjyer ju bashkuan këngëtarit duke kënduar krahas tij.
Koncerti në Cyrih ishte pjesë e turneut ndërkombëtar “Passion & Origin” të Ramë Lahajt, i cili do të vazhdojë edhe në disa qytete në Gjermani, Austri etj. Ai në këtë turne bën edhe prezantimin e Fondacionti Ramë Lahaj (Rame Lahaj Foundation) që është një organizatë kulturore e themeluar nga ai.
Misioni kryesor i këtij fondacioni është promovimi i muzikës klasike, zbulimi dhe edukimi i talenteve të reja në Kosovë dhe trojet shqiptare, si dhe ndërtimi i urave lidhëse midis artistëve lokalë dhe skenave ndërkombëtare të operës.
Foto&Video: Gent Mersinaj
