Kosova pranohet edhe në Federatën Evropiane të Atletikës

Me këtë pranim Federata Atletike e Kosovës u bë shteti i 51 që anëtarësohet në Federatën Evropiane të Atletikës

Pas pranimit në Asociacionin Ndërkombëtar të Federatave më 19 gusht 2015, tani Federata e Atletikës e Kosovës është pranuar edhe në Federatën Evropiane të Atletikës. Ky lajm ka gëzuar atletët kosovarë, ndërsa është pritur me shumë entuziazëm edhe nga Ministri i Kulturës dhe Sportit, Kujtim Shala.

Pranimi në Federatën Evropiane të Atletikës ka ndodhur të premten në Kongresin e EAA-s që është duke u mbajtur në Lozanë të Zvicrës. Me këtë pranim Federata Atletike e Kosovës u bë shteti i 51 që anëtarësohet në Federatën Evropiane të Atletikës.

Ministri i Kulturës, Rinisë dhe Sportit, Kujtim Shala, uron Federatën e Atletikës, me rastin e pranimit me të drejta të plota si anëtare në Federatën Evropiane të Atletikës (EAA).

Ministri Shala përgëzon drejtuesit e kësaj federate dhe atletët e Kosovës për këtë të arritur të jashtëzakonshme, duke u shprehur se ky është lajm i rëndësishëm për sportin e atletikës por edhe për fazën finale të procesit të ndërkombëtarizimit të sportit të Kosovës.

“Përmes anëtarësimit me të drejta të plota, atletëve të Kosovës përpos që u është mundësuar pjesëmarrja në garat ndërkombëtare, ata pritet të bëhen të njohur në botë, si dhe është një nxitje për zhvillimin e mëtutjeshëm të atletikës në Kosovë”, thotë Shala në deklaratën e tij.

Ministri Shala, tha se Ministra po punon që të krijojë lehtësira për funksionimin e federatave dhe po punon në përmirësimin e infrastrukturës sporteve në vend, kur tashmë pritet të përfundojë faza e investimeve në shtigjet e atletikës në stadiumin “Adem Jashari”, në Mitrovicë, ku atletët do të kenë mundësinë të zhvillojë përgatitjet e tyre.

Pas pranimit të Kosovës në EAA, kanë reaguar mediet serbe, të cilat e kanë quajtur këtë vendim si të turpshëm.

---