Raportimet për dronë të dyshimtë pranë Aeroportit Ndërkombëtar të Nurembergut kanë shkaktuar ndërprerje të fluturimeve dhe aktivizimin e masave të sigurisë.
Incidenti i parë u raportua në orët e mëngjesit, kur tre pilotë njoftuan për një dron të dyshimtë në afërsi të pistës. Si pasojë, autoritetet pezulluan përkohësisht të gjitha ngritjet dhe uljet e avionëve, ndërsa policia kufitare zhvilloi kontrolle në zonë, me mbështetjen edhe të një helikopteri. Pavarësisht kërkimeve, droni nuk u gjet.
Pas rikthimit të fluturimeve në normalitet, u raportua një tjetër incident që përfshinte një avion pasagjerësh nga Korfuzi. Për të garantuar sigurinë, ushtria gjermane ngriti dy avionë luftarakë, të cilët e shoqëruan avionin civil deri në uljen e tij të sigurt në aeroport.
Për të dyja rastet kanë nisur hetimet nga autoritetet gjermane. Deri më tani, nuk ka informacione zyrtare që sqarojnë shkaqet dhe rrethanat e plota të incidenteve.
