Policia në Chemnitz të Gjermanisë ka publikuar detaje të reja lidhur me përleshjen e ndodhur më 27 shtator, gjatë një festivali në fshatin Beicha, në zonën e Döbelnit, ku dhjetë persona pësuan lëndime, disa prej tyre të rënda, transmeton albinfo.ch.
Sipas të dhënave zyrtare, në mesin e katër personave ndaj të cilëve po zhvillohen hetime për lëndim të rëndë trupor është edhe një shtetas i Kosovës, 19 vjeç. Të dyshuarit e tjerë janë dy shtetas rusë, të moshës 22 dhe 17 vjeç, si dhe një shtetas serb 14-vjeçar.
Hetimet po vazhdojnë edhe për katër persona të tjerë, të cilët dyshohet se mund të kenë marrë pjesë në përleshje. Deri më tani, policia nuk ka konfirmuar zyrtarisht përfshirjen e personave të tjerë nga Kosova.
Sipas rindërtimit paraprak të ngjarjes, gjithçka kishte nisur me një debat verbal pranë një ure në zonën ku po mbahej festivali. Edhe pse situata fillimisht ishte qetësuar, më vonë dy burra dyshohet se kishin hyrë në një pronë private. Kur një person u kishte kërkuar të largoheshin, ata dyshohet se e kishin sulmuar atë, duke shkaktuar ndërhyrjen e pjesëmarrësve të tjerë dhe përshkallëzimin e situatës.
Policia ka bërë të ditur se disa persona ishin larguar para mbërritjes së patrullave dhe se gjatë përleshjes dyshohet të jenë përdorur edhe shishe qelqi të thyera.
Të plagosurit ishin të moshës nga 17 deri në 48 vjeç. Gjashtë prej tyre u dërguan në spital për trajtim mjekësor, ndërsa sipas raportimeve të mëvonshme, të gjithë u liruan pas disa ditësh.
Më 9 tetor, autoritetet vazhduan punën hetimore dhe u bënë thirrje dëshmitarëve që të dorëzojnë fotografi ose video nga festivali. Materialet mund të ndihmojnë në identifikimin e personave të tjerë dhe në përcaktimin e rolit të secilit në incident.
Hetimet mbeten të hapura, ndërsa për personat e përfshirë vlen parimi i prezumimit të pafajësisë deri në një vendim përfundimtar të gjykatës. /Albinfo.ch
