Të paktën 27 persona kanë marrë ndihmë mjekësore pas lëndimeve të pësuara gjatë protestës së së martës në Tiranë. Në mesin e tyre janë pjesëtarë të Policisë, protestues, gazetarë, kalimtarë të rastit dhe një diplomat i huaj, transmeton albinfo.ch.?
Ministrja e Shëndetësisë dhe Mirëqenies Sociale e Shqipërisë, Klodiana Spahiu, ka bërë të ditur se shtatë persona vazhdojnë të trajtohen në Spitalin Universitar të Traumës, ndërsa 20 të tjerë janë larguar nga institucionet shëndetësore pasi kanë marrë ndihmën e nevojshme.
Në Spitalin Universitar të Traumës po trajtohen një punonjëse policie, katër protestues dhe dy kalimtarë të rastit. Sipas ministres, ata janë jashtë rrezikut për jetën.
Ndërkohë, nga ky spital janë larguar pas trajtimit gjashtë pjesëtarë të forcave speciale, dy përfaqësues të mediave dhe katër kalimtarë të rastit.
Tetë persona të tjerë kanë marrë ndihmë mjekësore në Qendrën Spitalore Universitare “Nënë Tereza” (QSUT) dhe më pas janë larguar. Mes tyre ishin një diplomat i huaj, një përfaqësues i medias dhe gjashtë protestues.
Ministrja Spahiu ka theksuar se kujdesi shëndetësor u ofrohet të gjithë të lënduarve pa dallim, në bazë të gjendjes së tyre klinike dhe nevojave mjekësore.
Ajo ka shtuar se gjendja shëndetësore e të lënduarve po monitorohet vazhdimisht dhe se të dhënat për rastet e trajtuara përditësohen në bazë të informacioneve të verifikuara nga institucionet përkatëse.
Spahiu ka falënderuar ekipet e urgjencës, mjekët, infermierët dhe profesionistët e tjerë shëndetësorë për angazhimin dhe kujdesin ndaj personave të lënduar.
Pas përshkallëzimit të protestës, Policia e Shtetit ka njoftuar edhe pezullimin nga detyra të pesë zyrtarëve policorë, pas publikimit të një videoje ku shihet një 19-vjeçar i lënduar teksa shoqërohet nga policia pranë Parlamentit.
Për këtë rast kanë nisur hetimet disiplinore, ndërsa Agjencia e Mbikëqyrjes Policore, në bashkëpunim me Prokurorinë, po heton rrethanat e ngjarjes./Albinfo.ch
