Një supermarket në Gjermani ka vendosur të krijojë kushte më të qeta për klientët, duke rezervuar dy orë çdo javë për blerje me më pak zhurmë dhe ndriçim të reduktuar. Nisma, e quajtur “Ora e Qetë”, synon veçanërisht personat me ndjeshmëri të shtuar ndaj stimujve shqisorë, transmeton albinfo.ch.
Praktika zbatohet çdo të mërkurë, nga ora 14:00 deri në 16:00, në supermarketin e drejtuar nga Gashi. Gjatë kësaj periudhe, ndërpritet muzika dhe transmetimi i njoftimeve përmes altoparlantëve, ndërsa ndriçimi zvogëlohet në nivelin e nevojshëm.
Për të kufizuar zhurmat, punonjësit gjithashtu pezullojnë përkohësisht sistemimin e produkteve në rafte, duke shmangur tingujt shtesë që zakonisht shoqërojnë aktivitetin e përditshëm të supermarketit.
Ideja për këtë nismë lindi pas ankesave të disa klientëve për muzikën dhe ndriçimin e fortë. Pas kërkimit të alternativave, Gashi zbuloi se orare të ngjashme zbatoheshin edhe në supermarkete të tjera dhe vendosi ta provonte këtë praktikë.
Sipas tij, reagimet e klientëve kanë qenë pozitive, veçanërisht nga të moshuarit, të cilët e kanë vlerësuar mundësinë për të bërë blerje në një ambient më të qetë. Ai ka vërejtur gjithashtu se, me ndërprerjen e muzikës, edhe klientët priren të flasin me zë më të ulët.
Megjithatë, ambienti nuk është plotësisht pa zhurmë, pasi frigoriferët dhe arkat vazhdojnë të prodhojnë tinguj. Për këtë arsye, po shqyrtohet mundësia e kufizimit të mëtejshëm të zhurmave gjatë pagesës.
“Ora e Qetë” mund të jetë veçanërisht e dobishme për personat me autizëm, ADHD apo ndjeshmëri të shtuar shqisore, për të cilët zhurmat e shumta dhe drita e fortë mund ta bëjnë më të vështirë qëndrimin në hapësira publike.
Sipas Gashit, e mërkura është zgjedhur për arsye praktike, pasi atë ditë nuk ka furnizime të reja dhe pasditja zakonisht është më e qetë. Ai planifikon ta testojë këtë mënyrë funksionimi deri në fund të vitit 2026, ndërsa, nëse reagimet mbeten pozitive, nuk përjashton shtimin e një orari tjetër.
Nisma të ngjashme po planifikohen edhe në pjesë të tjera të Gjermanisë. Gjatë tetorit, në kuadër të Javës së Shëndetit Mendor, tri supermarkete në rajonin e Starnbergut kanë paraparë orare me zhurmë dhe ndriçim të reduktuar./Albinfo.ch
