Alarmante, fëmijët shqiptarë viktima të trafikimit në Britani

“The Guardian” e Londrës bën të ditur se, një pjesë e fëmijëve detyrohen të punojnë, shpesh në objekte ndërtimi, por shumica shfrytëzohen për aktivitete kriminale

Një e treta e të gjithë fëmijëve që trafikohen në Britani të Madhe janë nga Shqipëria dhe kjo është një shifër alarmante, shkruan e përditshmja prestigjioze britanike “The Guardian”. Këta fëmijë, pasi trafikohen në Britani detyrohen të punojnë si skllevër por edhe të merren me veprimtari kriminale.

Sipas shifrave të marra nga shoqata e bamirësisë, “Barnardo”, që merret me mbrojtjen e fëmijëve dhe që bashkëpunon me Ministrinë e Brendshme “Home Office”, viktimat e trafikimit po rritet me ritme alarmante, ndërsa numri i fëmijëve që vijnë nga Shqipëria, shpesh në mënyre vullnetare, por shfrytëzohen si skllevër.

Javed Kahn, shef ekzekutiv i kësaj organizate bamirësie që mbron të drejtat e fëmijëve, deklaron se “vlerësimet e tanishme të numrit të fëmijëve të trafikuar në Britani janë vetëm maja e ajsbergut”, raporton TCH.

“The Guardian” e Londrës bën të ditur se, një pjesë e fëmijëve detyrohen të punojnë, shpesh në objekte ndërtimi, por shumica shfrytëzohen për aktivitete kriminale. Sipas një vlerësimi të skemës që merret me mbrojtjen e fëmijëve të trafikuar, fëmijët shqiptarë përbëjnë një të tretën e të gjithë fëmijëve të trafikuar në Britani.

Ata vijnë të dytët pas fëmijëve vietnamezë dhe, nëse ky trend ardhjesh vazhdon, ata së shpejti do t’ua kalojnë vietnamezëve për nga numri, shkruan gazeta.

Para 5 vitesh, shkruan “The Guardian”, fëmijët shqiptarë nuk ishin një grup me rrezikshmëri të veçantë. Është fakt se ka një rritje mjaft të madhe të fëmijëve dhe minorenëve, që mbërrijnë në Britani për të kërkuar azil për gjakmarrje, orientim seksual apo nga frika e pretenduar e indoktrinimit ekstrem fetar.

Sipas rregullave aktuale, minorenët qëndrojnë në Britani deri në moshën 18-vjeçare dhe një pjesë riatdhesohen.