Rita Ora ka tërhequr vëmendjen në premierën e filmit të ri “Klara and the Sun”, të realizuar nga bashkëshorti i saj, Taika Waititi, në kuadër të Festivalit të Filmit BFI në Londër, transmeton albinfo.ch.
Këngëtarja 35-vjeçare u paraqit të enjten në tapetin e kuq me një fustan të zi me dantella, pjesërisht transparent, të kombinuar me një fund të fryrë dhe një zbukurim të madh në kokë.
Ajo pozoi para fotografëve së bashku me bashkëshortin e saj, ndërsa në premierë morën pjesë edhe aktoret Jenna Ortega dhe Amy Adams.
Kjo paraqitje publike vjen në një periudhë kur Rita Ora po përgatitet për projekte të reja muzikore dhe filmike. Këngëtarja ka ndarë së fundmi pamje nga studioja e regjistrimit, duke dhënë sinjale se po punon për albumin e saj të katërt në studio, publikimi i të cilit është planifikuar për vitin 2027.
Përveç muzikës, ajo do të jetë pjesë edhe e disa projekteve filmike. Mes tyre është filmi i Amazon MGM “Honeymoon with Harry”, ku pritet të luajnë edhe Jake Gyllenhaal, Kevin Costner dhe Sarah Pidgeon.
Ora është e përfshirë gjithashtu në filmin e ardhshëm “Voltron” dhe pritet të rikthehet në universin e “Descendants” me filmin “Descendants: Wicked Wonderland”. Në këtë seri, ajo ka interpretuar më parë personazhin e Mbretëreshës së Zemrave në “Descendants: The Rise of Red”.
Krahas karrierës në muzikë dhe film, këngëtarja po zhvillon edhe markën e kujdesit për flokët TYPEBEA, të cilën e ka themeluar së bashku me Anna Lahey.
Ndërkohë, paraqitja e saj në Londër vjen edhe pas raportimeve se ish-menaxheri i saj e ka paditur për 3.2 milionë paund, lidhur me pretendimet për pagesat e një përqindjeje nga të ardhurat e saj. Këto pretendime mbeten çështje ligjore dhe nuk përbëjnë konstatim të fajësisë./Albinfo.ch
