Pas koncertit në Cyrih, tenori shqiptar me karrierë ndërkombëtare, Rame Lahaj, vazhdon turneun e tij “Passion & Origin” me dy paraqitje të radhës në Evropë, në Gjermani dhe Austri, transmeton albinfo.ch.
Koncerti i radhës do të mbahet më 30 tetor 2026 në Düsseldorf, ndërsa më 8 nëntor artisti do të ngjitet në skenën e Wiener Konzerthaus në Vjenë.
Projekti “Passion & Origin” synon të sjellë në skenë një ndërthurje të muzikës shqiptare me atë ndërkombëtare, duke e vendosur në qendër lidhjen mes identitetit, origjinës dhe emocioneve që përcjell muzika.
Përmes një repertori që përfshin këngë të njohura shqiptare dhe vepra të dashura të muzikës botërore, Lahaj synon të krijojë një përvojë artistike që i bashkon traditat dhe kulturat përmes interpretimit muzikor.
I shoqëruar nga ARMA Ensemble dhe muzikantë të tjerë, tenori sjell një program që ndërthur elemente të trashëgimisë muzikore shqiptare me repertorin ndërkombëtar, duke iu drejtuar si bashkatdhetarëve në diasporë, ashtu edhe publikut të gjerë, transmeton tutje albinfo.ch.
Turneu përbën gjithashtu një mundësi për prezantimin e muzikës dhe kulturës shqiptare para audiencave ndërkombëtare, ndërsa për shqiptarët që jetojnë jashtë vendit ofron një lidhje emocionale me rrënjët dhe vendlindjen.
Datat e koncerteve
- Düsseldorf: 30 tetor 2026, ora 20:30, Robert Schumann Saal
- Vjenë: 8 nëntor 2026, ora 19:00, Wiener Konzerthaus, Großer Saal
- Informacionet për koncertet dhe biletat mund të gjenden në faqen zyrtare të artistit: www.ramelahaj.com.
