Kosova dhe Austria kanë ndërmarrë një hap të rëndësishëm drejt forcimit të bashkëpunimit në fushën e drejtësisë, duke negociuar dhe parafuar Marrëveshjen për Bashkëpunim Gjyqësor në Çështjet Penale.
Ekipet negociuese të Republikës së Kosovës dhe Republikës së Austrisë kanë përfunduar negociatat dhe kanë parafuar marrëveshjen që synon krijimin e një kornize më të qartë ligjore për bashkëpunimin ndërmjet institucioneve të drejtësisë të të dyja vendeve.
Sipas Ministrisë së Drejtësisë së Kosovës, marrëveshja do të mundësojë lehtësimin e procedurave dhe rritjen e efikasitetit në trajtimin e kërkesave për bashkëpunim gjyqësor ndërkombëtar, transmeton albinfo.ch.
Fushëveprimi i saj përfshin ekstradimin e personave të kërkuar nga drejtësia, ndihmën e ndërsjellë juridike në çështjet penale, transferimin e personave të dënuar, si dhe forma të tjera të bashkëpunimit ndërmjet autoriteteve kompetente.
Përmes kësaj marrëveshjeje, të dyja vendet synojnë të forcojnë mekanizmat e bashkëpunimit në trajtimin e çështjeve penale që kërkojnë koordinim ndërkombëtar, veçanërisht në luftimin e krimit ndërkufitar dhe transnacional.
“Finalizimi i kësaj marrëveshjeje përbën një hap të rëndësishëm në thellimin e bashkëpunimit ndërmjet Republikës së Kosovës dhe Republikës Federale të Austrisë, si dhe në forcimin e përpjekjeve të përbashkëta për parandalimin dhe luftimin e krimit ndërkufitar dhe transnacional”, thuhet në njoftimin e Ministrisë së Drejtësisë.
Parafimi i marrëveshjes shënon përfundimin e fazës së negociatave, ndërsa për hyrjen e saj në fuqi duhet të përmbushen procedurat përkatëse ligjore dhe institucionale.
