Partia Demokratike e Kosovës (PDK) ka reaguar pas raportimeve në media se Bedri Hamza ka ofruar dorëheqjen nga pozita e kryetarit të partisë.
Përmes një reagimi zyrtar, PDK-ja ka bërë të ditur se deri më tani nuk është marrë asnjë vendim zyrtar lidhur me këtë çështje. Sipas partisë, Hamza ka deklaruar më herët se, me hapjen e procesit të zgjedhjeve të brendshme, do të largohet nga kjo pozitë dhe nuk do të kandidojë sërish për kryetar.
Ndërkohë, PDK-ja ka theksuar se aktualisht është e përqendruar në përfundimin e hapave për mbështetjen e mbrojtjes së ish-krerëve të Ushtrisë Çlirimtare të Kosovës në Hagë, në fazën e apelit.
Në fund të reagimit, partia ka bërë të ditur se për çdo vendim apo zhvillim zyrtar brenda saj, opinioni do të njoftohet me kohë.
Reagimi i PDK-së vjen pas raportimeve të fundit lidhur me të ardhmen e Hamzës në krye të partisë.
