Mobilizimi i mamive në Spitalin Universitar të Lozanës (CHUV), në kantonin Vaud të Zvicrës, për harmonizimin e pagave po vazhdon. Në një mbledhje sindikale të mbajtur të hënën në mbrëmje, ato i kërkuan Këshillit Shtetëror të kantonit dhe drejtuesve të spitalit që të gjitha të kenë qasje në kategorinë e 10-të të pagave.
Aktualisht, në CHUV, dy mami që kryejnë të njëjtën punë mund të paguhen ndryshe: njëra në kategorinë e 9-të dhe tjetra në kategorinë e 10-të. Kjo varet nga reparti ku punojnë. Vetëm rreth një e treta e mamive të spitalit përfshihen në kategorinë e 10-të.
Sipas raportimit të Radio Televizionit Zviceran (RTS), diferenca mes pagave arrin mesatarisht në 8.000 franga zvicerane në vit, duke nxitur pakënaqësi dhe ndjenjën e padrejtësisë te punonjëset.
Kjo kërkesë daton që nga viti 2018. Sindikatat kritikojnë sistemin aktual, duke argumentuar se masat e kursimit po rëndojnë mbi punonjësit, në një periudhë të shënuar nga shkurtime buxhetore.
Përparimi konsiderohet i pamjaftueshëm
Pas tetë vitesh përpjekjesh dhe negociatash me autoritetet e kantonit Vaud dhe drejtuesit e CHUV-së, mobilizimi mund të ketë filluar të japë rezultate.
Sipas sindikatës dhe mamive të intervistuara nga RTS, kantoni po shqyrton mundësinë e zbatimit të një sistemi të bazuar në kritere të përcaktuara. Ky sistem do t’u mundësonte më shumë mamive avancimin në kategorinë e 10-të, duke marrë parasysh, ndër të tjera, përvojën e punës dhe kualifikimet profesionale.
Megjithatë, mamitë nuk heqin dorë nga kërkesa e tyre kryesore: të gjitha të përfshihen në kategorinë e 10-të të pagave.
“Po përparojmë, por kjo nuk mjafton. Është e rëndësishme të njihen aftësitë e të gjithë punonjësve dhe të eliminohet ky diskriminim”, deklaroi njëra prej tyre për emisionin e mëngjesit të RTS-së.
Përderisa kërkesa kryesore nuk është përmbushur, protestat dhe mobilizimi sindikal mund të vazhdojnë.
