Protesta e tetë në kryeqytet, e zhvilluar nga studentët dhe qytetarët, nisi me thirrjet për dialog nga kryeministri Edi Rama, por përfundoi me tensione dhe përplasje mes protestuesve dhe forcave të policisë.
Tubimi fillimisht u zhvillua para godinës së Kryeministrisë, ku një grup pedagogësh dhe më pas studentësh u mblodhën për të shprehur mbështetjen e tyre për të rinjtë. Përfaqësues të qeverisë përsëritën ftesën e Ramës për zhvillimin e një dialogu, por protestuesit nuk e pranuan atë dhe përmbysën karriget e vendosura për këtë qëllim.
Më pas, protestuesit marshuan drejt Ministrisë së Arsimit, ku situata u tensionua. Disa prej tyre hodhën gurë në drejtim të policisë, ndërsa efektivët ndërhynë për të shpërndarë turmën.
Protesta vijoi në bulevardin “Dëshmorët e Kombit”, ku një grup të rinjsh dëmtuan strukturën e një stacioni të transportit urban dhe e përdorën atë si pengesë përballë forcave të rendit.
Pas një periudhe qetësie, situata u përkeqësua sërish. Protestuesit hodhën gurë dhe mjete piroteknike drejt policisë dhe godinës së Kryeministrisë. Në përgjigje, policia përdori gaz lotsjellës, ujë me presion dhe mjete të tjera për shpërndarjen e turmës.
Rreth orës 19:30, protestuesit u mblodhën përsëri në bulevard, ndërsa përplasjet u zhvendosën drejt sheshit “Skënderbej” dhe zonës pranë Katedrales Ortodokse “Ngjallja e Krishtit”. Edhe në këto zona u raportua hedhje e molotovëve dhe fishekzjarrëve në drejtim të efektivëve të policisë.
Pas orës 20:00, tensionet u rikthyen para Kryeministrisë. Policia përdori spraj me piper dhe gaz lotsjellës për të larguar protestuesit, ndërsa nisën edhe shoqërimet e disa personave.
Gjatë gjithë ditës, protesta u zhvillua në disa zona të kryeqytetit, me ndërprerje të herëpashershme dhe përshkallëzim të situatës gjatë orëve të mbrëmjes.
Pavarësisht thirrjeve për dialog, deri në orët e mbrëmjes nuk u arrit një marrëveshje mes protestuesve dhe përfaqësuesve të qeverisë. Ndërkohë, zhvillimet e protestës vijojnë të ndiqen nga afër nga institucionet dhe opinioni publik.
