Këshilli i Sigurimit i Organizatës së Kombeve të Bashkuara (OKB) ka diskutuar për situatën politike dhe të sigurisë në Kosovë, dialogun ndërmjet Kosovës dhe Serbisë, si dhe të ardhmen e misionit të UNMIK-ut.
Gjatë raportimit para Këshillit të Sigurimit, përfaqësuesi special i Sekretarit të Përgjithshëm të OKB-së dhe shefi i UNMIK-ut, Peter N. Due, kërkoi bashkëpunim të plotë nga autoritetet e Kosovës dhe Serbisë për zbardhjen e rasteve të sulmeve në Banjskë dhe ndaj kanalit të Ibër-Lepencit, me qëllim që përgjegjësit të mbahen para drejtësisë.
Due theksoi gjithashtu rëndësinë e zbardhjes së fatit të personave të zhdukur dhe të bashkëpunimit ndërmjet palëve për adresimin e çështjeve të pazgjidhura.
Një pjesë e rëndësishme e diskutimit iu kushtua dialogut Kosovë–Serbi, të lehtësuar nga Bashkimi Evropian. Shefi i UNMIK-ut u bëri thirrje të dyja palëve të angazhohen në mënyrë konstruktive dhe të zbatojnë marrëveshjet ekzistuese, duke vlerësuar se përparimi në këtë proces mbetet i rëndësishëm për stabilitetin dhe marrëdhëniet ndërmjet tyre.
Në raportimin e tij, Due mirëpriti zgjedhjen e presidentes së re të Kosovës, Justina Shiroka-Pula, si dhe formimin e institucioneve të reja, duke i cilësuar këto zhvillime si hapa inkurajues drejt tejkalimit të ngërçit politik. Ai nënvizoi nevojën që ky përparim të reflektohet në qeverisje efektive dhe në shërbime për të gjitha komunitetet në Kosovë.
Ai rikonfirmoi përkushtimin e UNMIK-ut për mbështetjen e dialogut, ndërtimin e besimit dhe gjithëpërfshirjen ndërmjet komuniteteve, si dhe theksoi rëndësinë e vazhdimit të angazhimit ndërkombëtar në Kosovë dhe në rajon.
Gjatë paraqitjes së raportit, Due përmendi edhe miratimin nga Kuvendi i Kosovës të amendamenteve në Ligjin për Dhomat e Specializuara dhe Zyrën e Prokurorit të Specializuar.
Në mbledhjen e Këshillit të Sigurimit, Kosovën po e përfaqëson zëvendëskryeministri i parë dhe ministri i Punëve të Jashtme dhe Diasporës, Glauk Konjufca.
Raporti i fundit i shefit të UNMIK-ut përfshin periudhën nga 16 marsi deri më 15 shtator 2026 dhe paraqet zhvillimet kryesore politike dhe të sigurisë në vend, si dhe çështjet që lidhen me dialogun dhe punën e misionit të Kombeve të Bashkuara në Kosovë.
